Þessa dagana er mikið um breytingar í barnastarfinu.  Við erum að fá til liðs við okkur fjölda nýrra kennara sem gerir það að verkum að kennslan verður fjölbreyttari og skemmtilegri og hvert barn fær meiri athygli og persónulegri kennslu.  Ein stærsta breytingin hjá okkur er sú að við ætlum að fjölga hópunum okkar úr þremur í fjóra og skiptist gamli 7 - 12 ára hópurinn okkar þá í 7-9 ára og 10-12 ára hópa.  7-9 ára hópurinn okkar verður áfram í sama herbergi en 10-12 ára hópurinn færir sig yfir í gamla unglingaherbergið.

Reynsla þessa stóra hóps kennara (12 manns) er mjög mikil, enda eru þeir menntaðir á ýmsum sviðum og hafa allskyns reynslu af starfi með börnum og ungu fólki. 

Það er óhætt að segja að við séum mjög spennt fyrir því sem er á döfinni í barnastarfinu og gaman að heyra nýjar og ferskar hugmyndir frá nýju fólki.

Guð er góður og er greinilega að fara að gera eitthvað stórkostlegt með krakkana okkar.

Andri

Nú viljum við í barnastarfinu finna eitthvað flott nafn fyrir starfið í heild sinni og fyrir alla fjóra aldurshópana.  Því ætlum við að hafa keppni þar sem börnin geta tekið þátt (ef foreldrar eru með góðar hugmyndir þá verða þeir að hvísla þeim að börnunum).  Sunnudagana 18. apríl og 25. apríl verður hægt að koma með tillögur að nöfnum en verðlaun verða veitt fyrir bestu tillögurnar þann 2. maí.

Ef það gleymist að skila tillögunum til kennaranna er hægt að senda þær í tölvupósti á andri@krossinn.is.

Við í barnastarfinu ætlum að taka þátt í breytingunum sem eiga sér stað í kirkjunni okkar.  Hluti af þeim breytingum snýr að skipulagi barnastarfsins.  En við stefnum m.a. að því að fjölga hópum svo hver einstaklingur fái að njóta sín betur.  Hópunum verður fjölgað um einn með því að skipta elsta hópnum í tvennt.  Eftir það verða hóparnir fjórir; 1-3 ára, 4-6 ára, 7-9 ára og 10-12 ára.  Breytingarnar verða ekki strax enda þurfum við að fjölga kennurum áður en það verður.  Við erum að biðja Guð um 8 kennara til viðbótar til þess að vera fullmönnuð, en við höfum verið undirmönnuð síðustu ár.  Nú höldum við að tími sé kominn á að Guð fjölgi í hópi okkar.

Við erum líka að gera tilraun með að hafa fleiri hópa niðri frá upphafi lofgjörðarinnar, eða alveg frá 4 til 12 ára.  Það gerum við í kjölfar þess að sunnudagssamkomurnar voru takmarkaðar við eina og hálfa klukkustund.  Til þess að tryggja að það gangi upp hjá okkur biðlum við til foreldra að sækja börnin strax og samkomu er lokið (kl. 18) og taka þau með sér upp í kaffi.  Það er nefnilega reynsla okkar að börnin eru oft orðin mjög þreytt þá.

Á næstu vikum og mánuðum munum við halda áfram að breyta starfinu til þess að finna sem best form á samkomunum og biðjum við foreldra um að afsaka það. :)

Guð ætlar að gera stóra hluti með þessa frábæru krakka sem við erum með og við ætlum að gera okkar besta, með Guðs hjálp, til þess að tryggja að þeir fái að þekkja Guð og eiga samfélag við hann.  Það er eitt af takmörkum okkar að börnin trúi ekki bara á Guð sem mamma og pabbi þekkja heldur eigi þau persónulegt samfélag við hann.

P.s. Fyrir samkomur reynum við alltaf að senda foreldrum sms um það sem er að gerast þann daginn.  Ef þú hefur ekki fengið sms nýlega en villt fá það fyrir samkomur þá máttu endilega senda upplýsingar um nafnið þitt og barnanna þinna, aldur þeirra og símanúmerið þitt á andri@krossinn.is og við bætum þér á listann.

Við viljum endilega fá að kynnast foreldrum barnanna okkar og kynnast þannig börnunum betur í leiðinni þannig að hikið ekki við að koma niður með börnunum og kynna ykkur fyrir okkur. :D

Sjáumst á samkomu!

Andri

Það hefur verið rólegt hjá okkur í barnastarfinu yfir sumarið, eins og gengur og gerist þegar margir eru í fríi, en núna er starfið að fara á fullt aftur.  Guð hefur þó verið góður og verður það áfram.  Á næsta sunnudag verðum við uppi í lofgjörðinni en förum svo niður þegar predikun byrjar. 

Í sumar flæddi vatn yfir alla neðri hæðina og eyðilagði gólfefnin hjá okkur en Guð stjórnaði því eins og öllu og fengum við því teppi á gólfin, sem er í raun mikið hentugra fyrir okkur í barnastarfinu.  Við getum því þakkað Guði fyrir að allt samverkar þeim til góðs, sem Guð elska.

Sjáumst hress og kát!

Andri og Anna

Á eftir verður kynningardagskrá fyrir barnastarfið á samkomu.  Það verður mikið um að vera, dans- og söngatriði, vitnisburður, video o.fl. 

Sjáumst!

Á næstu vikum förum við í fullt gang með nokkrar þjónustur í barnastarfinu.  Þar fá krakkarnir að taka þátt í umgjörð samkomanna, m.a. með djáknaþjónustu og margmiðlunarstarfi.

Þeir krakkar sem eru að leita Guðs og þrá vilja hans eru velkomnir að hafa samband við kennarana ef þeir hafa áhuga á að hjálpa til.

Guð geymi!

Í september tóku nýir kennarar til starfa í barnastarfinu, það eru þau Grétar og Sigríður.  Þau munu taka við af Ragnari og Jónu sem hafa kennt 3-6 ára börnunum.  Við bjóðum þau velkomin til starfa og viljum endilega að sem flestir biðji fyrir þeim og barnastarfinu.

Einnig viljum við þakka Ragnari og Jónu fyrir vel unnin störf auk Tinnu sem hefur einnig hjálpað mikið í starfinu.